کتێبخانەی کۆتا شەقام

لەبارەی ئەم کتێبە

شار هەرگیز بە تەواوی خامۆش نەدەبوو. تەنانەت دوای نیوەشەو، شەقامەکان هێشتا بە ئاگا بوون، ڕووناکیی دووکانەکان بەسەر ڕێگا تەڕەکاندا دەبریسکانەوە، دووکەڵی جگەرە لە ناو کۆڵانە ساردەکاندا هەڵدەکشا و خەڵکی نامۆ نهێنییەکانیان لە پشت چاوە ماندووەکانیاندا دەشاردەوە. لە دوورەوە دەنگی ئەمبولانسەکان وەک گیانی کەسێکی بریندار وابوو کە لەتاو ئازار هاوار بکات، پاشان دیسان شار دەکەوتەوە ناو بێدەنگی. لە نێوان ئەم شارە بێخەوەدا، کتێبخانەیەکی بچووک هەبوو کە زۆر کەس گرنگی پێنەدەدا. هەر کەسێک دەهاتە ژوورەوە، زەنگۆڵەی سەر دەرگاکە بە نەرمی دەنگی دەدا. ڕەفەکانی پڕبوون لە سەدان چیرۆک، خۆشەویستی، تراژیدیا، فەلسەفە و تاوان. بۆنی کاغەز و قاوە هەوای شوێنەکەی پڕکردبوو، گەرمییەکی ئارامی بە هەر کەسێک دەبەخشی کە لە دنیایی دەرەوە هەڵدەهات. لە پشت مێزی فرۆشتندا، گەنجێک بە ناوی ئارام کاریدەکرد. خەڵکی بە گەنجێکی بێدەنگ و هێمن دەیانناسی. کتێبی بۆ خوێنەرەکان هەڵدەبژارد، قاوەی بۆ قوتابییە ماندووەکان دروست دەکرد، زۆربەی ئێواران لەنێوان لاپەڕەکانی کتێبدا ون دەبوو، لەگەڵ مۆسیقایەکی هێواش. بەڵام کەس نەیدەزانی دوای داخستنی کتێبخانە چی ڕوودەدات. کەس نەیدەزانی کاتێک چراکان دەکوژانەوە و تاریکی شەقامەکانی دادەپۆشی، ئارام دەبێتە کەسێکی تر. سێبەرێک، چەکێک، بکوژێکی بەکرێگیراو. هەرگیز بۆ تووڕەیی نەیدەکوشت. هەرگیز بۆ چێژ نەیدەکوشت. تەنها بۆ پارە. هەموو ئەرکێک سادە بوو: ئامانجەکە بدۆزەوە. دەست لە تفەنگەکە بدە. ون ببە. بێ ناو. بێ هەست. بێ هەڵە. تا ئەو شەوەی ئەو کچەی بینی. ئەو کچەی کە فەرمانی کوشتنی درابوو، نەدەبوو هیچ جیاوازییەکی هەبێت لەگەڵ ئامانجەکانی پێشوو. تەنها وێنەیەک بوو لە ناو زەرفێکی بچوکدا، لەلایەن پیاوێکی دەوڵەمەندەوە نێردرابوو، ئەو پیاوە دەوڵەمەندەی کە خوێنی خەڵکی لە ژێر جلە گران بەهاکانی خۆی شاردبویەوە. بەڵام چارەنووس زۆر دڕندەیە بۆ ئەو کەسانەی پێیان وایە دڵیان مردووە. چونکە هەندێک جار، تەنها یەک کەس بەسە... یەک پێکەنین... یەک گفتوگۆ لە نێوان ڕەفە تۆزاوییەکانی کتێبخانە... تا ژیانی مرۆڤێک کە لە تاریکیدا بنیاد نراوە، بە تەواوی بڕووخێنێت و وا لە بکوژێک بکات کە ئەرکەکەی تەواو نەکات، ڕاوەدوونان دەست پێدەکات. نەک تەنها بۆ کچەکە. بەڵکو بۆ هەردووکیان.