سینەما بە گێڕانەوەی هیچکۆک

لەبارەی ئەم کتێبە

ئەم كتێبەی بەردەستت وەرگێڕانی ئەو گوتوبێژەیە كە فرانسوا تروفۆی ڕەخنەگر و سینەماكاری فەڕەنسی، پێش مردنی لەگەڵ ئالفرێد هیچكۆكــی فیلمساز و دەرهێنەری دیاری خاوەن ستایلی سینەماییدا كردوویەتی. گوتوبێژی ئەم دوو هونەرمەند و هونەرناسە بە دەوری چوار تەوەردا دەخولێتەوە: ١. دۆخی پەیوەست بە بەرهەمهاتن و دەرهێنانی هەر فیلمێك، بە تایبەت فیلمەكانی هیچكۆك. ٢. ئامادەكردن و نووسینی سیناریۆی هەر فیلمێك. ٣. پرسی تایبەتی پەیوەست بە هەر دەرهێنەرێك. ٤. لێكدانەوەی ئەنجامە بازرگانی و هونەرییەكانی فیلم لە ڕوانگەی هیچكۆكەوە، بە سەرنجدان لەو چاوەڕوانییانەی كە ئەو لە بنەڕەتدا دەربارەی ئەو فیلمە دیاریكراوە هەیبوون. بە گشتی، كتێبی سینەما بە گێڕانەوەی هیچكۆك بەرهەمێكی شایەنی خوێندنەوە و لەبیرنەكراوە، كە نەك تەنیا دەربارەی سینەمای هیچكۆك، بەڵكه‌ بە شێوازێكی گشتی لەبارەی هونەری حەوتەمەوە كۆمەڵێك زانیاری و خاڵی سەرنجڕاكێش دەخاتە بەردەست. بە تایبەت فێرمان دەكات كە چۆن دەشێت بە سوودوەرگرتن لە كۆی توخمە ماددی و بینراوەكان، بەرهەمی قووڵ و ئاڵۆزی هەستەكی، زەینی، سۆزەكی و... بئافرێنین. خوێندنەوەی ئەم كتێبە سوود بە هەمووان دەگەیەنێت: * هونەرمەندانی پابەندی پیشەیی و سینەماكارانی سەرگەرمی، بە ستایل و قاڵب و زەینی هیچكۆك ئاشنا دەبن و بە گشتگرییەكی زیاتر و ئەزموونێكی زەینیی فراوانترەوە دەپەرژێنە سەر كاری فیلمسازی، ئەوسا بە هەڵبژاردنی ڕێگەیەكی دروست و لەسەر بنەمای پێویستی، بەرهەم پێشكەشی كۆمەڵگە دەكەن. ٭ توێژەر و ڕەخنەگران بە ئاگاداربوون لە گوتوبێژی ڕەخنەگرانە و پاساودراوی تروفۆ و هیچكۆك، دەتوانن پەرە بە وردی، تیژبینی و زانیارییەكانی خۆیان بدەن. * هەوادارانی هونەری حەوتەم بە ناسینی ئەو تیۆرانەی كە پەیوەستن بە فیلمسازییەوە و لەم كتێبەدا شەنوكەو كراون، دەتوانن گەشە بە هێزی دەرككردنی خۆیان بدەن و بە ئاسانی لە پەیام و زمانی جۆرێك لە سینەما تێبگەن.