دەروێشــــێ ئەڤــدی

لەبارەی ئەم کتێبە

زۆربەمان لاوکی دەروێشێ ئەڤدیمان گوێ لێ‌بووە و بەسەرهاتەکەی دەزانین. بەڵام ئەدی گەر ئەو داستانە ئەدەبییە بکرێتە ڕۆمان و بە زمانی شەکر بخوێنینەوە، هەر لە باس نایەت. کارەکانی "کەریم کاکە" زمانی نووسینیان ئێجگار شیرین و لەبەردڵانە. خۆماڵی و پەتی دەنووسێت و خەمی زمانی بە پێش هەموو خەمان خستووە. "دەروێشێ ئەڤدی" ڕۆمانێکە جگە لە چێژێکی ئەوینداری و خۆشەویستییەکی پڕ لە نەشئە لە لایەک و هەست‌وسۆزی "ئەڤدی بەگ" و ئێزیدییەکان بەرانبەر هەر هێرشێک دژی نیشتمان، بە لاکردنەوە لە خەمی زمانیش دەیبینرێت. زمانی نووسین و داڕشتەوەی ڕۆمانەکە، گەلێک باڵایە. بەداخەوە ئێستا زمانی ڕەسەنی کوردی و دەستەواژەی خۆماڵی زۆر بەکەمی ئاوڕیان لێ دەدرێتەوە؛ کەریم کاکە لەو نووسەرانەیە خەمی پاراستنی زمانی لە کۆڵ ناوە.