بە ڕێی کۆچبارا

لەبارەی ئەم کتێبە

"باران لێناکاتەوە. ئەوشۆ دەنگی باران ناخۆشترە لە قرمژنی گولـلەی سەرباز و جاشی ئەنفال، ناخۆشترە لە لوورەی تۆپی ئەنفال، ئەوشۆ ئەنفال بۆتە هەور و لەئاسمانەوە بەسەر کۆچباری کوردان دادەباری، چ شەوێکە ئەوشۆ... ." بە ڕێی کۆچبارا، ل. 147 توخمە بنەماکانی یادەوەری و گەشتنامە ئەم دووانەن: "کات و شوێن" لە ترپەی لێدانی دڵەوە بیگرە تا زەمەنی کۆتانەهاتووی گەردوون؛ لە بن پێی خۆتەوە تا هەسارەی بێسنوور. چیژ و جوانی و هێمنی و دڵنەوایی، ئەم کتێبە تەواو جیاوازە لە زۆر یادەوەری. سڕڕێکی ئەم جوانییە لە بەرجەستەکردنی سروشتدایە، جا چونکێ کەریم کاکە هەم شاعیرە و هەم ڕۆماننووس، وەک وەستای دەستڕەنگینی جاری جاران، مامەڵەی ئەدەبی و هونەریی لەگەڵ هەرچی پێکهاتەی سروشت هەیە کردووە.